الصفحة الثالثة عشر :

نحن نختار كيف نريد أن نكمل حياتنآ ..
رغم تدخل الكثير من الناس فيها ..
ولكن بعض الخطوات قد تكون عبارة عن تهور ..
وربما تكون سوء تفكير وإستعجال ،
ولا ندرك ذلك حتى فوات الأوان .. !
.
.
.
نوره : تبي الصج هيه أنآ كلمتها وخليتهاا تقتنع وقآلت أنها بترمسك بعد ..
حسيت بشعور مب حلو كيف يعني أمك تسأل عنك بس إذا حد خبرها تسوي هالشي !
مع أنها تخلت عني من سنين ،
نوره : شوف صدقني البنت طيبه وأكيد بتوافق دآمني طلبت منها هالشيء ف إستغل هالفرصه لصالحك ولآ بتم جيه طول عمرك فهمت ولآ ؟؟؟
رديت : بفكر في كلامج ..
.
.
.
بعد أذآن المغرب في بيت بو سعود ،
كنت يالسه أقرا قرآن مع أبوي .. كآن المكان هدووء مافي حد فالبيت غيري أنآ وأبوي والباقيين ظهروا مع سعود ،
يلسنا فالصاله وطلب مني أييب القرآن ونقرا مع بعض .. أبوي من يوم نحن صغار
كنا كلنأ نتيمع حوله وهو يقرا لناا وألحين حليله مآ يقدر يرمس كنت أطآلعه كل شوي مدري أخآف الأيام اليايه كيف بتكون
.. مر الوقت .. وبعدها شليت المصاحف ورجعتها الحجرة .. ولما رجعت عند أبوي قلت له : ها أبوي كيف نفسيتك إن شاء الله مرتاح ؟
أبوي إبتسم ..
قلت : أبوي منصور خبرني أسلم عليك .. وشكله يباله وقت لين ما يتأقلم مع خوانه ،
ويمكن يمر اليوم ويسلم عليك ..
شفته إبتسم قلت : أبوي شكلك وايد تحب منصور يذكرك بعمي الله يرحمه ..
أبوي حرك راسه بمعنى هيه ..

سمعت فوني يرن .. رديت كآن منصور : هلا ؟
منصور : ميثه أنآ عند الباب ..
قلت : أوك دقايق .. "وسكرت"
طالعت أبوي وقلت : وصل عمره طويل ههه تونآ نرمس عنه ..
عقب قمت بروح ألبس وقايه .. ركضت بسرعه رحت لحجرتي عقب رحت أفتح له الباب ..
شفته واقف : السلام عليكم ..
رديت : وعليكم السلام والرحمه حياك أبوي في الصاله ..
عقب دخلناا وهو راح يسلم على أبوي ، منصور : هلآ بأبووي الغالي " وباسه فوق راسه ويلسع عداله "
أنآ سرت المطبخ أشوف القهوه وخليتهم على راحتهم ..
.
.
.
,
( عند سعود وشيماء وأمه وحمود ) ..
كآنوا في محل الخياط ، يشترون مخور وسعود تعب وهو ينتظرهن ،

يلست أطلعهم شكلهم مطولين : أوووف أنتو لين مآتختارون إلي يعيبكم يبالك يوم كآمل ..
أميه وتسأل شيماء : أميه ماعلييج منه إختاري على كيفج وإذا ماعيبج إنروح محل ثاني ..
شيماء : فديتج عموه ماتقصرين ..
أميه : شوفي هذا حلوو عليج ..
شيماء وتراويني القطعه : سعوود شرايك في هاللون علي ..
قلت : مب حلوو ..
شيماء وتشل قطعه ثانيه : وهذاا ؟؟
رديت : مب حلو عليج ..
شيماء ومحتاره : إنزيين وهذااا ؟؟
قلت : بعد مب حلوو ..
شيماء : سعووود !!
ضحكت : ههههه أسولف وياج أي شي بتلبسينه بيصير حلو بس المهم خلصييناا ..
شيماء : خلآص اريد هذيله ..
أميه : زين يالله عيل وأنا باخذ هذي ..
قلت في قلبي أخيرا خلصوا " بعد ماخلصنآ حساب "
قلت : يالله بس تعبت وأنآ واقف ..
أميه : بنروح محل الدخون والعطور ..
قلت : أميه بس خلآص تعبت والله ..
شيماء وتضحك علي : هههههه هيه عموه بعد أنآ في خاطري أشتري العطر إلي رمستج عنه ..

طالعتها بنص عين : نعم شيماء شو قلتي ..؟؟
شيماء : عموه شوفي ولدج كيف يطالعني ..
أميه : سعود خل البنت بحالي الله فديتج بآخذج المحل إلي دوم أشتري منه وإشتري إلي بخاطرج ..
تأففت شفت حمود : أنا محد كاسر خاطري كثر حمود ليش يايبيينه معاكم ما أدري .. ولآ عادي مستانس "طالعته وقلت" والله قاصيين علييك ..
حمود : ثعوود بعدين بنروح الألعاب ..
لآ والله !!! سويت عمري ما أسمعه أنا الغلطان إلي قلت بوصلهم : هيه إنزين يالله بسرعه خلصن شغلكن ..
.
.
,
قريب أذآن العشاء ، ( في بيت بو سعود )
كنت أطآلع الساعه شكلهم مطولين خخ الله يعين سعود الحمدلله مب أنآ إلي وصلتهم ،
منصور : ميثه مييه!!
رديت : هلا ؟
منصور : سرحانه خخخ أقولج أنآ باخذ عمي وبنسير المسيد قريب يأذن ..
رديت : مدري أخآف يتعب ولآ شي صعب عليه يمشي !
منصور : لآ ما عليج بالعكس أحسن لجسمه مآتدرين شو بيصير وبعدين الحركه تساعد الجسم إلي مثل
حاله عمي ، أنا بخلي السياره والمسيد قريب مب بعيد وايد .. لين مآنصل يكون أذن ..
تميت أفكر أخآف أخليه يروح .. !
منصور : الووو ؟؟
رديت : أوك خلآص بس تحمل من أبوي ..
منصور وابتسم : لآ تحاتين .. يالله ابوي باخذ المسيد " عقب رفعه منصور ويلس يمشيه "

كلام منصور أثر فيني لأن حتى الدكتور قال أن حالة أبوي يمكن تتحسن إذا حاولنا معاه ..
ظهروا من البيت وتميت واقفه عند الباب .. مدري ليش كل هالخوف فجأه !!
منصور إلتفت وقال : دخلي داخل قلت لج لآتحاتين يالله في أمآن الله ..
دخلت وسكرت الباب ..
ليش تخافين ميثه !! منصور يمكن أكثر مني يخاف على أبوي ..
دخلت حجرتي ويلست على الشبريه .. شفت نوره داقه علي .. إتصلت عليها أشوف شو تبي ؟

ردت علي : هلآ والله ..
قلت : أهلين نوره شحآلج عساج بخير يارب ؟؟
نوره : والله الحمدلله بخير .. ممممم كنت أريد أرمسج في موضوع ،
رديت بإستغراب : خير إن شاء الله صاير شي ؟
نوره : لآ ، بس مدري الكلآم فالفون ماينفع شرايج باجر أمر بيتكم ؟
قلت : حياج في أي وقت مآعندي مانع ..
نوره : فديتج والله أوك عيل بخليج ألحين وباجر أكلمج ..
رديت : الله وياج .. "وسكرت"

حليلها هالبنت دوم تتصل حقي من يوم صآرت قريبه بالنسبه لي وهيه تسأل عني مب مثل
ساره ، على الأقل كانت المفروض تتصل تسأل عني هيه حتى مآفكرت تتصل كل هالفتره ..
يلست أطالع رقمها أتصل ولا لا ؟ ..
ممممم بطرش لها مسج كتبت لها ( هلا سارووه .. شحالج ؟؟ إن شاء الله بخير ^^ ) ..

طرشته وعقب سمعت الأذآن ..
يالله بصلي ألحين وعقب بروح أسوي لي شي آكله يوعانه ..
\

/

\

/
,
في اليوم الثآني ، ( العصر ) في بيت بو سعود ..
يلست أفكر فلي صار أمس علاقة أميه وشيماء حلوه خاصه يوم رجعوا البيت
حسيتهم مستانسين حتى سعود كان يضحك ويسولف معاهم وحمود بعد
كان مستانس لما ييه وقالي أن شيماء شرت له حلاوه ويلسوا يلعبون

معقوله أنا كنت غلطانه يوم فكرت أن شيماء ممكن تكون سبب المشاكل ؟
بس ليشه المحبة نزلت فجأه . . كيف تغيرت فجأه !!
شفت فوني وقريت رد ساره إلي للحين مب مصدقه أنها كتبت لي هالكلآم !!
( زين يعني فكرتي تسإلين ولا كالعاده لازم أنا إلي أسئل عنج ) .. !!
ليش يعني تقول هالكلام إلي بينا مب متحاي نتعازم منو يسأل عن الثاني ..

قمت ببدل ثيابي نوره بتمر اليوم .. فتح الكتب وخذيت لي مخور لونها ذهبي وبني غامج ،
حطيتها علي ممم شكلها حلو ؛ هذي شريتها من فتره يوم رحت مع أميه .. بلبسها اليوم
من يوم شريتها مالبستها غير مره ، عقب دخلت الحمام عزكم الله أخذ شور ..
.
.
بعد مآخلصت سمعت صوت حد يدق الباب رحت فتحته شفت أميه ..
أميه : ميثه اليوم في حرمه بتمر عندنا بعد شوي ..
قلت وأنا مستغربه : بس أنا عزمت ربيعتي تمر عندنا اليوم ؟؟؟
أميه : زين شوفيها عادي المهم ألحينه أنا بروح أجهز الفواله ..
رديت : أوك .. "عقب راحت"
أووف شوو هاا يعني مآفكرت الحرمه تمر إلآ يوم نوره بتمر عندي بطرش لها مسج
وبقولها .. شليت فوني وكتبت ..

( نووره .. أميه عازمه حرمه إذا مآخاب ظني مب مشكله بنيلس أنآ وإنتي في غرفتي عسب نآخذ رآحتناا ؛) أول مآتوصلين خبريني ) ..
رحت المطبخ وولع فحم عسب أسوي بخور وأبخر البيت ..
شفت شيماء نازله وعليها ابتسامه غريبه : مساء الخير ..
ضحكت : ههه مساء الورد ..

شيماء : تصدقيين تووني يايه بسوي بخور تعرفين منو بييه اليووم ..
طالعتها بإستغراب : ممممم حرمه مدري منو بس ليش هالوناسه ..
شيماء : ممممم لأني أعرف منو هالحرمه .. "وابتسمت" ..
حطيت الفحم و مديت لها المبخر وقلت : دآمج متحمسه لهدرجه روحي بخري الميلس . . "وتحركت "

غريبه شيماء شوفيها اليوم خخخ حآلآت هالانسانه ..
رحت أشوف فوني ماشي رد يلست أنتظر رد من نوره مآترد
إتصلت لها أكثر من مره !! ماشي رد بسم الله شو صار معاها ..
تميت أحاتيها .. معقوله صار شي لآ شووو يمكن حاطه فونها سايلنت ولآ شي ..
.
.
.
.
مر الوقت وبعدها سمعت صوت شيماء : مييثه .. مييثه !!
فتحت الباب : هلآ شيماء ؟
شيماء وإتأشر : تعالي الصاله الحرمه وصلت ونوره بعد ..
إستغربت : أها أوك ..
نزلت من الدري ودخلت الصاله شفت حرمه أول مره أشووفها !! ونوره بعد يالسه ..
سلمت عليهم ويلست عدال نوره : نوره ليش ماتردين علي ؟؟
نوره إبتسمت .. ومآقالت شي ..
أميه : هذي ميثه ..
الحرمه : هيه ماشاء الله عليهاا ربي يخليها لج وعسى تفرحين فيها ..

شيماء وإطالع الحرمه : هيه عموه ترا مآبتحصلين وحده أحسن من ميثه ..
طالعتها بإستغراب شو يقولون هذيله ..

آميه : ميثه الحرمه يايه تخطبج حق ولدهآ .. والقرار الأول والأخير لج ،
إنصدمت !!!!!!! تميت ساكته أميه شو تقول !!
نوره وتبتسم : ميثه هذي أميه وكلمتها عنج وإن شاء الله اذا مكتوب بتصيرين مرت أخوي ..

وقفت من الصدمه !!!!! من متى نوره يالسه تفكر تخلي أمها تخطبني لأخوها !!
أميه : ميثه شو فيج يلسي ..
رديت : ها هيه "ويلست "
حسيت عمري مب مستوعبه إلي يصير كانوا يتكلمون ويتكلمون .. وأنا في عالم ثاني ما قدرت أركز
على إلي يقولونه دخلوا في وايد مواضيع .. وكل مآ أميه التفت صوبي قالت شي هزيت راسي بمعنى
انزين وأنا ما أدري شو السالفه .. تميت طول اليلسه ساكته .. !!
ماحسيت بالوقت .. وآخر شي أذكره يوم وقفت الحرمه إلي طلعت في النهايه أم نوره ونوره ..
يسلمون على أميه وشيماء وبيرجعون بيتهم .. وسملوا علي ونوره لما سملت علي ..
همست لي : أتمنى توافقين ..
وعقب ظهروا ..

رجعت يلست مكاني بعدني مب متأكده صج الي صار ولا لا ..؟
على أساس نوره تمر عندي ونيلس نسولف . مب أنه أمها اتيه وتخطبني حق ولدها ..!!
حسيت بإميه يلست عندي وقالت : ميثه شو فيج .؟؟
رديت : ها .. ماشي بس منصدمه شوي ليش ماقلتي لي من البدايه ..
أميه : ماعليه المهم ألحين إنتي شو رايج .. إذا ماتبين تتزوجين مب غصب هالشي في إيدج مب مجبوره ..
وإذا من رايي الحرمه ماشاء الله عليها طيبه ، وبعدين انتي تعرفين نوره وهذيله من أهل شيماء يعني
أشوفهم ناس طيبين وماعليهم كلام وإذا عن الولد ان شاء الله باجر بيمرون وتشوفينه وتردين لهم الخبر ..

ضحكت : ههههه أميه منو قال أني أبي أتزوج ..؟؟؟
أميه : لتقولين جيه هذا نصيبج وإذا مكتوب أنج تتزوجين بتزوجين ..
رديت : إنزين أنا ما أفكر في هالشي وبعدين أميه بعدني صغيره ..
أميه : شو صغيره ماشاء الله عليج كل شي تعرفين وباجر بيصير لج بيت وعيال وابوج بيفرح فيج ..
قلت : لآ مب الحين أنا أريد أشتغل بالأول ..
أميه : ووين تبين تشتغلين مآفي شغل بدون دراسه ..
رديت : عادي بكمل دراستي ..
أميه : زين على راحتج إنتي باجر شوفي الولد وإذا ماشي نصيب فالله كريم ..
قالتها وهيه مضايقه حسيت فيها عقب قامت راحت حجرتهاا ،

كانت شيماء واقفه تسمع قالت : مممممممم يعني مب موافقه ..؟
رديت : تعرفين أني مابي اتزوج ألحين وبعدين ليش خلصوا البنات !! ..
شيماء وتضحك : ههه عادي وأنا كنت نفسج مآبي بس جبروني ؟ وبعدين مافكرتي في شعور نوره؟؟
رديت : و شو يعني أسوي شي بس علشان خاطرها وأنا مابي هالشي ؟
شيماء : ممممم مدري كيفج فكري عدل ب هالطريقه بتخسرين نوره وأخوج بعد يمكن يضايق ..

ضحكت : هههه لأنه ولد عمج يالسه تقولين هالكلام ؟؟ ولا عشان نوره ؟
شيماء : لآ نوره ماتهمني ولا حد يهمني أصلا ، بس حبيت أوضح لج الفكره عسب لاتندمين عقب ..
" وعقب راحت " ..
ياربي شو بسوي ألحينه .. قمت بروح حجرتي بس سمعت صوت سعود ..

سعود : ميثووه .. "وييه صووبي"
رديت : هلآ ؟
سعود ويطالعني منصدم ومبتسم نص ابتسامه : صج كلآم شيماء ؟؟
قلت في بالي هذي مآتخلي شي الا وتخبر سعود ، رديت : كلام شو ؟
سعود ويضحك : ههه لآتستهبلين صج يوه يخطبونج ؟
رديت : أووف هيه صج ..
سعود ومستانس : حلفي !!!!!
طالعته بإستغراب : لآ والله بعدد مستااانس حيوان تبي الفكه مني ..
سعود : لآ شووو منو قال أنا مستانس لأن إلي بيخطبج ربيعي ..
رديت : هاا؟؟
سعود : شو هاا ، عاد لأتفشليني وترفضينه ..
قلت : تستهبل صح ؟ قوول انك تستهبل ؟؟
سعود ويضحك : ههههههه ليش أستهبل ..
"سويت له طااف ورحت حجرتي "
.
.
.
.
,
يلست طول اليوم أردد في بالي مستحيل أوافق مستحيييل !!
كنت أطالع فوني محتاجه أكلم حد بس مقدر ساره أدري تغيرت ويمكن كلامها يضايقني ..
وشوق مقدر أتصل لها مابي مشاكل ومابي يتكلمون عني أكثر .. وعموه فديتها تعاني مع ولدها
أكلم منوو !! ماتم حد ربيعاتي مشغولآت فالدراسه مابي أشغلهن معاي .. ومهووه .. آمنه ربيعتي
مب متفيجه لي أدري من يوم خذيت رقمها مآتتصل ولآ أنا أتصل لهاا ..
تذكرت آمنه إخت شيماء هههه شو هذي صغيره شو بقول لهاا ..
على الأقل بتصل لها وبسأل عن حالهاا ..
شليت فوني وإتصلت لهاا ..

ردت علي : هلآ ميثثثثه ؟؟
رديت : أهلين شحآلج دبوه ؟؟
آمون : بخير الحمدلله إنتي شحآلج ؟؟
قلت : مديم حالج ، والله ماشي الحال ملآنه شوي ومحتاره في أمور ..
أمون : ههههه زين شرايج إتيين عندي ..
قلت : لآ مقدر ألحين مره ثانيه ..

آمون : تعااااااااااالييي بليييييييييييزز ..
رديت : مآ أحييدج جيه عنييده هههههه ..
أمون : والله أنآ بروحي ملآنه لو أدل بيتكم كنت بمر عندج بس مآ أعرف وين بيتكم ..
قلت : هههه لهدرجه مشتاقه حقي ؟
أمون : ههههه يب أريد أشوفج
رديت : يالله مب مشكله المره اليايه إن شاء الله .. زين خبريني كيف الدراسه ..؟؟
أمون : الحمدلله زينه ..
قلت : زين شدي حيلج نبي درجآت حلوه ، وسلمي على الكل .. والهامستر بعد هههه
أمون وتضحك : هههههه زيين يوصل ربي يسلمج ..
قلت : يالله عيل أخليج ..
أمون : الله وياج .. "وسكرت"
.
.
,
قلت بإستغراب : ليش يعني ؟؟
شيماء وتضحك : ههههه شو ليش يعني أكيد ميثه رافضه لأن وضعه سيء يعني من حقها ترفض ..
قلت : سيف عنده فرصه يتعالج يعني ماتدرين شو بيصير عقب وبعدين ليش نستبعد أن ميثه ماتوافق نصبر ونشوف..
شمياء : إنت تقول جيه لأن ربيعك بس أنا كلمت ميثه وهيه مب موافقه ..
رديت : في النهايه مانقدر نجبرها ..
شيماء : سعود أكيد مانقدر نجبرها بس ب هالطريقه يمكن تصير فجوه بين علاقتكم فيهم ..
ضحكت : هههههه لآ مستحيل يصير شي جيه لآتحاتين ..
شيماء : ممممم ليش هالثقه وبعدين سيف إنسان عاجز حاليا ..
قاطعتها : ويعني في النهايه هذا نصيب ، ليش الي مثل حالته حرام يتزوج ويعيش حاله حال أي انسان ثاني ؟

شيماء وتعاند : شوف انت تقول جيه لأنك ربيعه ..
قلت : خلاص غيري السالفه .. خبريني شو قلتي بموضوع السفره ؟؟
شيماء : الله كريم ..
رديت : والنعم بالله .. هيه صح تذكرت أنآ قلت أني ما بشاورج يعني مب مهم رايج ..
.
.
.
,
(( في اليوم الثاني )) ،
كنت يالسه فالصاله أطالع فلم .. وكل شوي أشوف الساعه كل شوي ..
ياربي شو هاليوم من أمس وأنا أحاتي .. سمعت صوت حد نزل من الدري .. كآنت شيماء ..
سويت عمري ما أشوفها .. يلست عدالي : مساء الخير .. " سكتت عقب قالت مره ثانيه " مسااااء الخيييير !!
رديت : مساء الخيرات ..
شيماء : شكلج متوتره ..
قلت : لآ ؟
شيماء : لآ يبين عليج متوتره ..
طالعتها : غصب أكوون متوتره ؟؟ ..
شيماء وتضحك : ههههه لآ لا لآتفهميني غلط بس حبيت أساعدج .,
رديت : شكرا ما أريد منج شي ..

شيماء : ما تم شي لين مآيوصلون روحي إتعدلي وإتكشخي ..
رديت : مابي غصب ؟؟ بطالع الفلم ..
شيماء : ميثه شوفي الساعه كم ..
تأففتت :أوووف ماابي قولوا البنت رفضت من البداايه وخلاص ..
شيماء وإنصدمت : شوه !!! ميثه من صجج إنتي ؟؟
ضحكت : هههههه ليش تتحريني بوافق عشان خاطركم ..
شيماء حسيتها اتقفطت وكأنها كآنت تخطط علشان هالشي وأنا خربت عليهااا ..
كنت أحس شي في داخلي يقول هالموضوع مخططين له وتباني أظهر من البيت عسب تاخذ راحتها ..
تدري أن وجودي بيخرب كل شي يالسه تخطط له .. يمكن نوره ماتدري ب هالشي ..

رديت : ليش سكتي ؟
قالت وهيه متوتره : ها لا .. ماشي .. بس .. كيفج .. "وسارت"
رحت عند أميه وقلت لها أذا يوه تقول أني رآفضه .. وخلاص ننهي هالموضوع ..
حسيتها ماتبي تقول أكيد بتحس بإحراج جدامهم بس يالله عادي بيتقبلون هالشيء فالنهايه ..
رحت حجرتي وقفلت الباب علي ..

شفت فوني نوره متصله أكثر من مره .. يمكن شيماء خبرتها ..
سوري نوره مقدر أسوي هالشيء بس علشان مصلحة غيري ولا علشان خاطرهم ..
طرشت لها مسج مآ أريد أرمسها كتبت فيه ( السموحه نوره ما أقدر ) ..
إنسدحت على الشبريه، ويلست أفكر ..
ليش أربط حياتي بإنسان بالمقابل غيري مستانس وأنا أتعذب ..
تذكرت أخوي سعود هيه بيضايق لأن ربيعه بس عقب بينسى ..
\

/

\

/

\ ,
أسوء أمر أن تشعر بأنك تشكل حملاً ثقيلاً ..
على نفسك ومن هم حولك !
فيحاول الجميع الإبتعاد عنك ..

أن تجبر على أمر فقط لأنك تراعي مشاعر من حولك
كأن تقع في بئر صنعته بنفسك دوم أن تدرك ..
فتتخلى عن الكثير من أجلهم ،

قد نتطر بأن نفكر في مشاعر أصدقاء وأقرباء
فتشعر حينها بأنك في حيرة من بينهم ،
ومن يستحق الأفضل في حين أنك وضعت لهم معزة في قلبك ..
فلا تعلم تتخلى عن أي أحد فيهم !!

(( لمآ وصلت أم نوره ))
كنت أطالهم : أمييه وصلوا أسمع صوت حد يدق الجرس ..
أميه : سعود إنت روح داخل ..
رديت : أنآ بروح أشوف سيف وإنتوا دخلوا الحريم الصاله والرياييل الميلس ..
أميه : هيه زين ..
عقبها راحت أميه وشيماء .. بس قبل لآتروح شيماء همست لي : ترا ميثه مب موافقه وتقول مابتظهر من حجرتها ..
رديت : صج ؟؟!!
شيماء حركت راسها بمعنى هيه وسارت ..

مدري أروح أرمسها ولا لا .. على الأقل تنزل وتكلهم مب حلوه تحبس عمرها فالحجره جيه ..
في نفس الوقت مابي أروح أدري فيها بتعصب وبتسويها سالفه ..

رحت استقبل الرياييل ودخلتهم الميلس .. كان سيف وعمه بو شيماء وأخو شيماء بما أنه أبوه متوفي ،
سرت يلست عدال سيف وقلت له : سيف ..
سيف : هلا ؟
رديت : كنت بقولك يمكن مايصير نصيب ..
سيف وابتسم : من غير ماتقول أدري .. بس خلهم يتقبلون هالشي ..
قلت : منو تقصد ؟؟
سيف : أميه وإختي أباهم يتقبلون هالشيء أدري مافي وحده بتواقف على واحد في مثل حالتي بس
هم الله يهديهم مدري ليش جيه تفكريهم ..
رديت : لا تقول جيه ..
سيف : هه زين المهم نخلص من هالموضوع بسرعه ..

كنت أطالعه يعني هو متوقع هالشي وعادي عنده ، اشك أهله بينصدمون لأنهم حاطين املهم في ميثه
وأنا مثل ما سيف ربيعي ميثه إختي وأكيد أبي مصلحتهاا ، وهيه تستاهل كل خير مب مجبوره تعيش مع سيف ...
.
.
.
,
(( عند الحريم )) كآن الوضع متوتر وأم سعود وشيماء يتبادلن النظرات ..
أم سيف : ماتقصرون والله ..
نوره تتلفت لشيماء : شيماء شحآلج ؟
شيماء : الحمدلله بخير ..
أم سعود كآنت تحاول تدور عذر ولا شي كآنت مستحيه تتكلم ..
شيماء تهمس لها : عموه ألحينه شو بنقول حقهم ..
أم سعود : مدري شو بقول لهم كلميهم إنتي أحسن ..
أم سيف كآنت تطالعهم وحاسه في شي .. عقب قالت : عيل وينها بنتكم ؟؟

شيماء تطالع أم سعود ومتوتره : هيه .. عموه هيه بعدها .. في الحجره يمكن .. ماتدري ..
أم سعود : هيه .. بروح أشوفهاا " ووقفت "
شيماء وقفت تصب لهم القهوه ..

أم سعود راحت لحجرة ميثه تدق الباب : مييثه .. مييثه . أميه وينج ؟؟ .. ميثه !!!
ماشي رد .. حاولت مره ثانيه : ميثه أميه .. إنتي راقده ؟؟ !!!
ماشي رد ..

رجعت الصاله ، ويلست ..
شيماء وتهمس : ها اشو صار ؟؟
أم سعود : بصراحه يا أم سيف مانبي بينا زعل ..
أم سيف بإستغراب : وليش الزعل يا أم سعود ؟؟
نوره كآنت ساكته لأنها تدري ميثه رافضه أنها توافق على أخوها بس مابينت شي جادم أمها ..
أم سعود : ميثه بنتي ..
شيماء : عموه يعني بنقول الصرآحه لأن ..
أم سعود تكلم : شكلها ميثه ..
... : السلآم عليكم ورحمة الله
إلتفتت أميه وشيماء ومنصدمين !! : ميثه !!!!!!!!!!!!!!!!!!!!

رحت صوب أم سيف وسلمت عليها : شحالج عموه عساج بخير ؟؟
أم سيف : يسرج الحال الغاليه ..
ورحت سلمت على نوره : شحالج نوره ؟؟
نوره ومستغربه وقفت تسلم : الحمدلله بخير ..

يلست وقلت : السموحه أدري تأخرت عليكم ..
أميه تم تطالعني منصدمه ، وشيماء نفس الشي ..
حسيت عمري غبيه أني ظهرت بس مابي يكون الموقف محرج ، وخاصه أنها عمة شيماء ..
ونوره حليلها مآبيها تضايق على الأقل أكون موجوده وعقب يصير خير ..
مر الوقت عقب سرت مع أميه وسعود عسب يشوفني سيف ، ماكنت متوتره ولا شي حسيت عادي
يمكن لأني شفته من قبل .. دخلت أنا وأميه وسعود عقب ظهرت أميه وتم سعود .. كنا ساكتين مانرمس ..

بس سعود إلي كان يرمس : شو يعني محد بيرمس ؟؟
كنت أطالع سعود إلي كان يالس فالنص بينا ..
وأخيرا سيف تكلم : مب مجبروه توافقين ..
سعود ويقاطعه : ليش هالكلام ألحينه ؟؟
رديت : ماجذب صح كلآمه ..
سيف : هه زين بس حد فيكم فكر كيف يقنع إلي برع بالموضوع ؟؟ ولا بتخلون السالفه علي أنا ؟
سعود ويفكر : هممممم والله مدري شو أقول يعني هم حاطين أملهم فيج ميثه ..

قلت وأنا منقهره : ألحين أنا بتزوجهم ولا بتزوج سيف .. ليش مصرين ان سيف يتزوجني؟
سيف : كلامها منطقي !
عقب تمينا نفكر شو بنسوي ..
سعود ضحك فجأه : هههههه والله تضحكون ..
قلت : لآ والله !!
سيف : مب وقته سعود هالضحك ..
سعود وماسك عمره : زين خلآص بلآكم كليتوني ..
سيف : أنآ إنسان عاجز ألحين وعلآجي مطول مدري إذا برجع أمشي شرات باقي الناس مره ثانيه ..
سعود : زين الله كريم ..
سيف ويكمل كلآمه : أي وحده بترفض ترتبط بإنسان مثلي "عقب طالع سعود" إنت ماتبي إختك تعيش مستانسه ؟
سعود ويطالعني : أكيد أباها تعيش مستانسه ..

سيف ويطالعني : زين خلاص ميثه بعد مآتظهر تقول بتفكر في الموضوع وعقبها تقول خلاص مابي ..
كنت أطالعه ومستغربه منه يعني هو صج مآفكر يخطبني وكله علشان أمه وإخته !! ..
وهو حاس أني مجبروه على هالشي وأن متوقع أني أرفضه ،
سعود : ميثه ؟..!!
رديت : هاا .. مدري !
سيف : نوره عبالها أنج بتوافيق بمجرد أن العلاقه بينكم صارت قويه بس هذا مايمنع أنج
ترفضين خاصه واحد مثلي مثل ماتشوفين أنا ما أقدر أعيش مثل أي إنسان ثاني وفتره العلاج مطوله
والأمل أني امشي مره ثانيه أشبه بالمستحيل .. وإنتي تستاهلين كل خير وفي وايدين غيري ..
سعود : أوك خلآص مثل ما اتفقناآ ..

كان سعود محتار فيهم في نفس الوقت يحاول يراعي مشاعر سيف وميثه !!

عقب ظهرت أنا وسعود وكآنوا كلهم واقفين يتريوني هههه ..
قلت ببرود : مدري بفكر وعقب برد لكم الخبر ..
ورحت حجرتي وأنا مستغربه كيف جيه أهله ماحسوا بمشاعره .. حطوه في موقف مب حلو أبد ..
كنت أطالع الباب متوقعه حد منهم اييه ويرمسني بس محد .. شكلهم يبوني أفكر على راحتي ،
حسيت بظلم بالنسبة لي أني آوافق على سيف .. وفي نفس الوقت موقف أهل سيف ماعيبني أبد ..
فكرت شو بسوي قلت بصلي إستخاره وبفكر ..